|
|
|
Microsoft kompaniyasi bilan bitim...
|
O'zA, Viktor Nikolayev - Toshkentda O'zbekiston axborot texnologiyalari korxona va tashkilotlari assotsiatsiyasi (O'zbekiston IT assotsiatsiyasi) bilan Microsoft kompaniyasi o'rtasida axborot texnologiyalari sohasida hamkorlik to'g'risida bitim imzolandi.
Hamkorlik aloqalarini o'rnatishdan ko'zlangan maqsad O'zbekistonda yangi axborot texnologiyalarini joriy etishga ko'maklashish, yuqori sifatli axborot va telekommunikatsiya infratuzilmasini rivojlantirish, axborot texnologiyalari sohasida jamoat, davlat hamda tijorat tuzilmalari o'rtasida aloqalarni yo'lga qo'yish va mustahkamlashdan iborat.
O'zbekiston Respublikasi Prezidenti Islom Karimovning 2002 yil 30 maydagi "Kompyuterlashtirishni yanada rivojlantirish va axborot-kommunikatsiya texnologiyalarini joriy etish to'g'risida"gi farmonida axborot-kommunikatsiya texnologiyalari sohasida ustuvor vazifalarni amalga oshirish choralari belgilangan. Bunday choralar xorijlik sheriklar bilan uzoq muddatli hamkorlikni yo'lga qo'yish va shu yo'l bilan O'zbekistonning jahon axborot hamjamiyatiga integratsiyalashuvini tezlashtirish imkonini beradi.
Tadbirda ta'kidlanganidek, bugun O'zbekiston axborot texnologiyalari bozoridagi muhim vazifalardan biri - dasturiy ta'minotni ishlab chiquvchilarning mualliflik huquqlarini himoya qilish borasida o'zaro kelishilgan va samarali siyosatni amalga oshirishdir. Tomonlar o'zaro ekspert va maslahat yordami ko'rsatishdan tashqari, assotsiatsiya a'zolari uchun Microsoft texnologiyalari bo'yicha o'quv dasturlarini amalga oshirish hamda dasturiy ta'minotni ishlab chiqish jarayonini tashkil etishni rejalashtirmoqda. Bu borada Microsoft korporatsiyasining "elektron hukumat"ni tashkil etish bilan bog'liq tajribasi ham muhim ahamiyat kasb etadi.
Imzolangan hujjat mamlakatimizning investitsiyaviy jozibadorligini oshirish va uning jahon axborot makoniga integratsiyalashuvini jadallashtirishga yordam beradi. U O'zbekiston kompaniyalarining ta'lim, davlat boshqaruvi sohalarida hamda mahalliy dasturiy ta'minot bozorida keng ko'lamli qo'shma loyihalarda ishtirok etishini ko'zda tutadi.
O'zbekiston axborot texnologiyalari korxona va tashkilotlari assotsiatsiyasi ijrochi direktori Ilhom Abdullayev qabul qilingan memorandum xalqaro axborot texnologiyalari bozorida yetakchilik qilayotgan kompaniyalar, jumladan, Microsoft kompaniyasining O'zbekistonda biznesni rivojlantirishga qiziqishidan darak berishini ta'kidladi. Bunda gap nafaqat tijoriy manfaat, balki O'zbekistonda axborot jamiyatini rivojlantirish bo'yicha hamkorlikda faoliyat yuritish xususida bormoqda. O'zbekiston axborot texnologiyalari korxona va tashkilotlari assotsiatsiyasi hamda Microsoft kompaniyasining Toshkentda Elektron boshqaruv bo'yicha vakolat markazini tashkil etish borasidagi sherikligi muhim yo'nalishlardan biri hisoblanadi.
|
|
|
|
Ginnesning rekordlar kitobidan...
Amerikada bepul o'qish mumkinmi?...
Uyali telefon tarixi...
